極限運動，聽個名就知道要挑戰極限，過程之中當然帶不少驚險萬分嘅動作，咁先至夠刺激好玩；不過雖然危險，亦都要識得保護自己，所以正式學玩滑板，第一堂唔係教你踩板，而係先教你點「仆街」！記住，跌落地唔會要拿渣沙，而係滾地沙！
記者：王震遠
攝影：伍慶泉
Model：Suey@InterplayWorkshop
查詢：HKSBC（64413247）
鳴謝：http://www.x-fed.com
高速跌落板 易傷頭
新手上路，唔係要學識踩板，最緊要先識保護自己，HKSBC滑手Matai指出，自救方法大概歸納為4式，其中1式新手最易遇到，就是身體慢慢失去平衡：「好多時候平衡感唔夠好，重心會移位，導致整個人企歪，因為滑板有輪的，重心會移位。」這時候就用上身帶到整個人向前作平衡。
另一個最緊急的情況，就是在高速的滑板上失平衡，那時候就要識得用臀部落地，盡量令身體在地上滾動，就可以將傷害減少：「呢個情況最大機會扭傷腳或撞傷頭部，係我們最唔想見到嘅事，如果用身體滾動就不易扭到腳，因為已經離開滑板，這個時候最重要是保護頭部。」
自保4式
第1招：失平衡 傾前
當發現平衡感唔夠時，上身可前傾，當真的跌倒時，就算離開滑板都不會向後跌。
第2招：撞板前 急停
當發現不能控制速度或有障礙物，可將腳踭貼地，利用抓地力量按停滑板。
第3招：勁驚時 跳走
另一情況，是整個人都很驚恐，不能將腳放在地上，這時可在滑板側邊跳走。
第4招：跌落地 碌圈
最緊急情況，是已經不幸跌倒！緊記不可用手去擋，因為很容易弄傷；最好方法是用臀部落地，兼滾動身體卸力。
玩命4式 諗過先玩！
FlatBar 易傷蛋
在FlatBar上玩BoardSlide，一定要小心將滑板放上去，如果沒有信心別試。因為無信心去玩，易玩跳起後但滑板無郁到，整個人跳埋去FlatBar，須知人到板不到，就好易受傷，會有機會傷到重要部位，男性生殖器官都可能會受損。
QuarterPipe成個彈開
在QuarterPipe玩RockandRollFakie，因為動作回落時需要用後腳去㩒後Truck的轆去掂住QuarterPipe，等前轆有足夠空位落去，先可以順利離開。如果動作做得唔好，就好容易發生前Truck卡住在Pipe頂，就好大機會失去重心，之後整個人作前、後跌，再成個人彈開。
KickFlip撻生魚
最多人玩的KickFlip都有機會受傷。當你起跳的時候，前腳需要很快的將板踢向前，造成一個空位給滑板凌空轉動；當板面向天時再將腳踩去下，但如果力度不適中就會轉多或轉不夠。有時會踩在板底，或者打側時踩下去，就會成個撻落地。
DropIn撞傷腰
玩DropIn時，呢個花式係踩住滑板由台頂最高處滑落去，要注意滑落時要將重心和平衡全部傾向前，整個人準備滑下時不可將重心向後，那很容易受傷，通常在滑下不久的地方就會連人帶板跌下，如果失手，就有機會撞到腰部或者頭部。
