陳山聰成功追到賭王千金何超雲，前日更正式拜見家長，隨時身份三級跳成為賭王女婿，下半世唔使憂。昨日一眾無綫好友紛紛祝賀陳山聰前途似錦，其中楊怡叮囑他日後記得帶挈自己，到澳門時招待她豪飲豪食，甚至送上泥碼都唔拘。而一向視陳山聰如細佬的伍詠薇，語重心長寄語他拍拖之餘千萬不要荒廢工作。
賭王何鴻燊三房千金何超雲和無綫藝員陳山聰拍拖多月，但兩人一直死口不認，前日兩人歐遊四個多月終於捨得回港，超雲馬上帶男友見家長，陳山聰正式拜會賭王以及三太陳婉珍，之後超雲更在微博貼上一家合照，正式公開陳山聰正印男友地位。陳山聰冧掂超雲，隨時身份三級跳成為賭王女婿，日後衣食無憂。
消息昨日見報後，一眾陳山聰的無綫同事好友紛紛送上祝福，其中楊怡到黃埔出席活動時，對於陳山聰被超雲承認男友身份，楊怡笑說：「我唔知佢公開戀情呀，不過陳山聰有好嘢記得帶挈我呀，希望我去澳門嘅時候招呼我啦，請我豪飲豪食，或者畀啲泥碼我啦。其實佢喺微博都有私訊畀我，不過真係好耐冇見，我會叫佢請我食飯。」
伍姑娘勸勿棄事業
不過陳山聰自從和超雲拍拖後，被指重色輕友，楊怡表示友情不會影響愛情，相信他可以處理得到，凡是他的朋友都會支持他，其他則不方便講得太多。
至於一向視陳山聰為細佬的伍詠薇，哎吔家姐是否一早已知情？她昨日在電話尷尬說：「可唔可以唔回應，我平常心去睇，佢哋係後生仔女，企埋好OK。」伍估娘表示會送上祝福，但她不忘寄語對方：「佢啲戲其實幾好，希望可以返嚟拍番嘢。」雲山戀曝光，伍姑娘可會多聯絡陳山聰前妻Ponny送上安慰？她說：「個個我都錫同關心。」
敏之：公開咗可解脫
與陳山聰私交甚篤的陳敏之昨日亦送上祝福：「只要山聰開心，我一定祝福佢。佢呢幾個月都承受好多壓力，公開咗可以解脫。」敏之透露早前和Ponny見面，敏之表示她生活不錯。
跟陳山聰老友鬼鬼的郭政鴻對於兩人拍拖早有心理準備，但男女身家懸殊，陳山聰被指高攀，鴻仔揚言不作評論，只說：「我淨係恭喜佢，只要係真心相愛，愛情係無價嘅。」有否跟山聰通電話時，鴻仔笑道：「呢個係我私人同佢嘅秘密，總之我會祝福佢，其實公開得嘅，感情都穩定㗎啦。」
採訪：李珮洳、比華利
攝影：林德雄
