換咗個新髮型嘅紐卡素中場祖爾巴頓，打法確係幾爛，不過偏偏就恰死阿仙奴啲球員，繼上季之後，前晚又用陰招搞到兵工廠嘅新兵謝雲奴喺英超首子戰就領紅牌出場，助紐記打和0:0，連續兩季幫球隊喺對方身上攞分，仲唔搞到紐記肥佬班主艾殊利對佢又愛又恨？
謝雲奴插水起紛爭
祖爾巴頓早排因喺twitter批評紐記嘅買賣球員政策，激嬲咗肥佬，將佢免費掛牌，但上周六仍然擔正。仲記得上季紐記主場對阿仙奴半場輸0:4，但去到50分鐘祖爾巴頓粗野攔截戴亞比，搞到戴亞比嬲爆出手叉落佢後頸，仲領紅出場囉！紐記以眾凌寡下，神奇逼和阿仙奴4:4。
呢位中場好手上季季初扮奇勒基寶留二撇雞，今季就齋玩髮型，將兩邊鏟青。轉咗look嘅佢一樣咁陰濕同蠱惑，喺76分鐘走去挑釁喺禁區內詐跌嘅謝雲奴，夾硬拉起對方。點知謝雲奴又EQ低，忍唔住一掌拍落祖爾巴頓塊面度，祖爾巴頓應聲倒地後，謝雲奴亦硬食一面紅牌。令本來冇乜優勢嘅阿仙奴最後打和0:0。
同黑人球員似有仇
祖爾巴頓賽後好得戚咁講：「係呀，我係好易跌㗎。鬼叫佢郁手呀，球證做得好啱。若果你出手打人塊面，梗係被罰出場啦。你哋想我點呀，唔通同佢鬥抽咩？如果佢唔插水就乜事都冇。我整個夏天勤力練習，佢居然喺我面前博大霧！叫佢尊重吓比賽，插水應該罰停賽3場。」
祖爾巴頓亦喺twitter插埋幫謝雲奴講說話嘅阿仙奴中場韋舒亞：「韋舒亞，你唔係見唔到桑治對我做過啲乜嘢呀？」查實祖爾巴頓喺陰謝雲奴之前，喺冇波在腳情況下俾桑治一腳踩落去，但佢居然冇發難，算謝雲奴唔好彩啦！話時話，好耐之前佢因打到達保而入冊，連埋謝雲奴同舊年嘅戴亞比，唔通佢同啲喺法國踢過波嘅黑人球員有仇？