早兩個禮拜，魏力同朋友去大球場睇波，4萬人同場吶喊，好不熱鬧！人山人海，手機上網經常出現「塞車」情況，朋友拎出iPhone想開Facebook，等咗5分鐘都上唔到，連撥個輪都唔通，火滾。
見此情況，魏力即管拎部iPhone出嚟試吓，先開Facebook做個Check-in，冇難度；用Whatsapp同朋友吹水，冇問題；上載張大球場相上Facebook，有啲慢，都做到。魏力用嘅台係數碼通（315），朋友是甚麼台，心照。
魏力不是代言人，無必要幫數碼通賣告白，但股價確實反映其網絡服務的優勢。近期大跌市，港股6日唔見3000幾點，但數碼通幾乎紋風不動，都係12至13蚊上落，距離歷史高位10%唔到，強勢得有點可怕。
公司快公佈全年業績，彭博綜合券商預測，全年料賺6.74億元，即下半年純利3.53億元，較上半年增長一成。盛傳iPhone5年底推出，加埋白色iPad等產品，可助數碼通財源滾滾來。股價上周五漲1.9%，收13.60元，可於業績前買第一注，博業績帶動股價破頂（14.38元），再加碼，中線上望16至18元。
魏力