「葫蘆之父」陳瑞麟（Dennis）中學時學玩攝影，藉攝影追女仔，之後便愛上影人為主題。設計出身的Dennis戲言對這個興趣「玩」得好認真，投資的時間、心機到金錢都達瘋狂程度，由菲林到數碼，由改裝百年歷史軍用古董鏡頭，到最潮的數碼Leica相機都會涉獵得到，更會「磨爛蓆」上網尋找收藏家割愛，絕對是鍥而不捨的攝影狂。 撰文：梁錦雯
因設計葫蘆首飾而獲「葫蘆之父」稱號的陳瑞麟攝影年資達30年，他中二學攝影追女仔，在家中廚房自製黑房曬相，充滿實驗意味，到現在會為拍一幅靚相，玩足一日攀山涉水搬腳架影8x10"菲林大底機，越「玩」越pro。
Dennis日前帶了廿多部心愛「玩具」受訪，包括有百多年歷史的軍用古董鏡頭配大底菲林機、雙鏡反光的Rolleiflex，到最新的LeicaM9P，都屬收藏級數珍品，更是不少攝影迷的dreamcamera，每一件寶貝落在Dennis手中背後都有滔滔不絕的故事，一點一滴都反映他對相機及攝影的火紅熱情。
為寶貝苦等半年
Dennis對攝影情懷有理性答案：「可以takeaway平日工作同生活壓力，我喜歡影人像，因為比較有交流，能建立默契。每個人有唔同character，所以影人好好玩，透過一個freeze嘅moment，表達到好多，牽涉着深層哲學、思想同學問等心態環境。」
近5、6年Dennis開始接觸古董相機，更行遍歐洲、上海、北京、台北、東京及尖沙嘴香檳大廈一帶尋心頭好，他說：「平時影digital太方便，整理相片會好好，我早期都唔太鍾意古董相機，不過當你接觸到古董鏡頭，會發現現代鏡頭影唔到舊鏡影出嚟嘅味道，終於忍唔到手買舊鏡，加上自己係設計出身，對product的設計感覺好強，發現有啲牌子嘅相機好似Rolleiflex咁，設計好似藝術品。」
為尋寶Dennis更上網搜索，他說：「試過為搵一支1863年嘅鏡頭，喺討論區識咗個70幾歲、來自美國嘅攝影名人，見佢喺網上展示嘅珍藏已經流晒口水，之後同佢通信做咗筆友，又請教佢攝影，煩咗佢半年，佢終於肯割愛。」
堅決不買限量版
愛收藏不同牌子及種類相機的Dennis表示：「我會玩牌子最精嘅嘢，唔同牌子，唔同format有唔同精品，各有character，如Rolleiflex梗係玩雙鏡反光、寶麗萊就玩底大、Leica鏡頭由顏色，成像都好有character。但我唔會買限量版相機，因為我真係會用相機，唔係買嚟儲，擺喺個夾萬度唔用，所有限量版對我嚟講都嘥氣。」
場地：81/2OttoeMezzoBOMBANA（歷山大廈）
作品獲國際認同
世界不同藝術單位都曾邀請Dennis作個人攝影展，對此他說：「影相容易揀相難，要時間整理，我理想嘅展覽係搞大型裝置，贊助都有晒，惟獨冇時間。」去年他獲邀參加了兩個展覽，當中的「黑白情懷攝影聯展」他便以佛教手印為構圖，破格地以platinumprint，用太陽光的紫外光來曬相：「拎去愛爾蘭曬，曬嘅過程太毒，香港冇人做。」他又成為Leica全球邀請的十個攝影人之一，以Love為題影相，他以BrigitteGiraud短篇小說《L'amourestTresSurestime》（台譯：愛情沒那麼美好）為題材，以10張影像以電影情節攝影出來：「描述個模特兒由邂逅、上床、事後煙，到最後分開的迷茫心情等，我玩得好認真，好似拍戲。」
愛影旗袍
Dennis攝影靈感多，他其中一個進行中的project便以旗袍為題，已拍攝的人物有梁詠琪、焦媛、黃婉君、周汶錡及北京名模李丹妮等，他說：「已經影咗4年，我最喜歡1900到1930年嘅中國，呢個project係用番當年嘅機器，以東方人角度，睇番中國事物，發掘東方獨特美感。」
