前日英超開鑼，有幾個球員都整個新髮型示人，而曼聯前鋒朗尼更加係搶閘登場，早喺上個禮拜日場社區盾展示織出嚟嘅新Look。
紐記中場祖爾巴頓玩鏟青，同場喺阿仙奴中場桑治就染髮，將頭頂部份染成金啡色，但點都唔夠利物浦中場魯爾梅利斯（圖）咁搶鏡。呢個葡萄牙腳整咗Mohawk，即係雞冠頭，可惜佢呢個頭幫唔到球隊贏波，紅軍只係打和新特蘭1:1。紅軍領隊杜格利殊當正自己玩緊fantasyfootball，除咗放1月簽嘅蘇亞雷斯同安祖卡路爾落場，仲居然一次過派晒今夏簽番嚟嘅荷西安歷基、查理阿當、佐敦軒達臣同埋達寧打正選，睇到我求大俠O晒嘴。杜帥賽後話好失望，但佢排個咁嘅陣，搞到隊波打得半場好波，球迷仲失望呀！
