作為越野四驅車的忠心死硬派，相信都曾經以擁有一部三菱Pajero為目標，雖然今時今日越野四驅潮確不及當年勇；不過反而令四驅可以獨當一面，三菱ASX就是最好例子，將車身縮水，換個細引擎，加強時代感，成功打造一部玩味十足的四驅車。
記者：趙慧敏
攝影：王文忠
Model：JancyWong
加減撥片 增添玩味
十幾廿年前諗起四驅車，總係啲高頭大馬，外形硬淨的車形；不過時至今日，四驅不再是獨沽一味，種類可以好多。如果加埋三菱喺四驅車方面嘅金漆招牌，好多人總會對佢投下信任一票。雖然ASX唔係再以四驅為主要賣點，反而偏重時代味，但擁有一部三菱四驅技術的SUV，兩者都兼顧得宜，確實討人歡心。
ASX日本本土原本名為RVR，以4,295×1,770×1,625mm體形來說，可以定位為中型SUV，外形無疑與同門兄弟Lancer有幾分相似，帶有多少跑味，擺明係衝着年輕人市場而來。既然以年輕人為對象，總要加多少新意，最新這款升級版就配備了玩味更多嘅加減波撥片操控，右加左減令駕駛樂趣再提升。顧得玩味，都要夠方便至得，軚盤新增附設多功能按鍵，音響操控一手掌握，揸起車嚟安全感都大啲。另外ASX的四驅系統分別具有「2WD」、「4WD」及「4WDLOCK」等三種行車模式，令ASX可以在城市輕鬆遊走外，遇上技癢，亦可在「4WD」模式輔助下，一嘗輕量級越野滋味。
車身偏高 懸掛恰當
車廂以簡約佈局為主，中控台操控按鍵大多以圓碌碌按鍵設計，表現出可愛一面，不過最討人歡心非巨型天幕莫屬，得閒揸車到郊外望住藍天白雲，有乜悶氣都一腳踢走。可能有人嫌ASX脂粉味濃，唔啱粗獷男士們胃口，不過講性能絕對唔會令你失望，配備1.8LMIVEC引擎，最大輸出馬力139匹，扭力達17.5kg-m，在6速加減波輔助下，迂迴山路表現毫不扭擰，雖然車身偏高，不過懸掛調校軟硬適中，車身偏側情況無喺佢身上出現。
樹脂沙板 自動修復
試車過程中確實出現一場「驚心動魄」場面，就是模特兒壓向前輪沙板擺Post時，竟發現沙板即時凹下，嚇得模特兒第一時間彈開，神奇地沙板卻可回復原狀。之後才知道前輪沙板以高級樹脂製成，遇上輕微碰撞後可自動修復，雖然你可能會話佢唔夠硬淨，但唔好彩遇上輕微碰撞，架車都唔使撞到「入肉」，唔好彩撞到人，受傷程度都可以減低。
三菱ASX
引擎：1,798ccMIVEC
馬力：139ps/6,000rpm
扭力：17.5kg-m/4,200rpm
傳動：6前速CVT波箱
售價：$269,900
查詢：27211111（寰宇汽車）
