聲帶潰瘍開處男騷
李治廷學金句冧黎明

李治廷處男音樂會前晚在九展舉行，不少圈中前輩好友如葉德嫻、張婉婷和羅啟銳、陳奐仁和Mr.等捧場，李治廷的父母亦現身撐乖仔。Mr.的Dash帶同索女到場並肩而坐，但影相時兩人表現避忌。
既然是處男音樂會，李治廷瞓身演出，彈結他時又打鼓，但原來他抱恙上陣：「係咪覺得我把聲好沉好迷人，因為我聲帶潰瘍，喺上海拍戲時上呼吸道感染，拍戲時又要大聲叫，結果搞到咁，醫生叫我唔好唱，但第一次我唔想取消。」

Janice肥嘟嘟

提到聲帶潰瘍，李治廷透露：「父母鬧就梗，但我真係好多謝Leon（黎明），佢好支持我，冇哦過我一聲，只係開會時叫我呀一聲畀佢聽，佢話冇事，仲介紹醫生畀我。」台上全男班上陣，樂手有JoeyTang和Mr.的Tom，他們叫Tom帶女仔上台調劑一下，李治廷聞言搞笑說：「咁我介紹我嘅嘉賓，係羅蘭姐。」蘭就蘭，不過是衞蘭（Janice）至真，久違的Janice身形依然肥嘟嘟。
完騷訪問時李治廷表示幸好未有工作，可以封嘴休息一個月。提到有傳老闆娘樂基兒有BB，李治廷表示不會追問，他又直言：「如果我將來有仔女，都會學Leon咁溝通，佢啲金句其實唔係咁難明，聽真就明白。」完騷後李治廷即場搞簽名會，有約200fans輪候。