美國主權信貸評級下調引發金融市場大波動，香港股民不少騰騰震，冇得瞓。惟獨煲呔一人最瞓得着。
唔係因為特首冇炒股或炒樓，而係自2008年金融海嘯以來，佢一直係大淡友，年年八月埋位同各司局長傾施政報告，呢位末日特首都會發表一番美國及全球金融即將崩潰論，有佢講、冇人講。有時連財金系官員都粒聲唔出，一味低頭聽佢一番偉論。
可惜事與願違，在美國大印美鈔政策下，末日特首的預言三年來從未實現。歐債危機、希臘債務危機看似山雨欲來，一時又估計美國會出現甚麼雙底衰退，但始終未有出現全球骨牌式金融崩圍。末日特首的偉論出不了禮賓府，聽眾也越來越少，近日只剩下好兄弟財爺鬍鬚曾而矣！
但煲呔的大淡友取態，卻直接影響了政府的樓市政策，老董八萬五遇上亞洲金融風暴的噩夢歷歷在目，他一直驚自己出手隊冧樓市之際，會遇上全球金融大崩潰，所以遲遲不肯出重手，改變勾地表加入主動推地措施，拖了近一年才出台。
復建居屋拖到任內最後一份施政報告仍左擰右擰，死唔肯立即扑槌，就為了等，等乜嘢，就係等待全球金融危機再現。
煲呔呢類人愛打逆境波，叫佢主攻就會無所適從，太平盛世就會懶散，一旦有危機就領袖上身，特別醒神，以克林頓ComebackKid打不死自居。若危機持續，煲呔可能又行一次尾運。唔單止以行動反駁SoundBite之皇王光亞貶AO言論，而且可以強政勵治直至明年6月30日，你話係咪瞓得着之餘，仲會陰陰嘴笑呢？
添馬男