陳山聰媾掂賭王千金何超雲，拍拖多個月後超雲終於公開承認陳山聰的男友地位，前日更帶他回家拜見賭王何鴻燊及媽咪陳婉珍，陳山聰見家長第一關總算順利pass，一眾無綫藝員紛紛向他送上祝福。
呂慧儀：我都係睇報紙先知呢件事，兩個人嘅感情事，外人真係好難畀意見，不過我都戥佢哋開心。我覺得佢哋又唔使太在意人哋點講，只係需要同屋企人交代。
阮兆祥：我哋係同事，我聽到話見咗家長，係咪真㗎，咁咪好囉，任何人拍拖都戥佢開心，始終做我哋呢行咁辛苦壓力又大，有愛自己嘅人畀鼓勵同支持係值得高興，如果係事實會恭喜佢哋，希望佢哋生活愉快。實sweet㗎，祖藍同亞男、思捷同春卷都好sweet。
龔嘉欣：我未睇報紙，之前佢喺一套劇入面做我阿哥，都戥佢開心，戥佢搵到個佢真心鍾意嘅人開心。
古巨基：我好耐之前同山聰係同一間公司㗎，藝能動音，我梗係會恭喜佢。
謝天華：我冇睇到報道，人哋啲私人感情問題真係好難講，不過作為一場同事同朋友都戥佢開心。
朱慧敏：作為同事當然戥佢開心，拍拖係開心事，祝福佢哋。藝人公開承認拍拖當然會有啲壓力，相信佢哋會有心理準備，不過感情係兩個人嘅事，外人唔方便畀意見。