陳山聰跟賭王千金何超雲已正式承認戀情，從兩人命格可否參透出二人感情能否開花結果？
司徒法正
山聰屬龍，超雲屬蛇，龍蛇混雜，風雲色變。佢哋都仲係年輕，如果能夠走埋一齊，就會有個幾大發展，喺生命中會有重大嘅變化。佢哋最好拍3年拖先結婚，龍蛇混雜綁埋一齊，箍得太緊嘅話會「索死」，所以等大家相處耐啲，就會好好多。
麥玲玲
山聰本身個八字係「天干連兩字，兩重婚姻事」，命中係要結兩次婚。而超雲今年流年合提綱，今年感情會認真對待，甚至會有結婚衝動，亦有機會有喜。明年係關鍵，因為山聰明年又合提綱，到如果過咗2013年機會就唔高。不過超雲命格仲有啲桃花同機會，要刻意經營呢段感情就要一份堅持。
區仲德
山聰命格屬火，今年行緊福星貴人帶財，財星代表女性緣，夫妻宮咁啱又有粒紅鸞星，應該係真愛嚟，能夠結合嘅機會達八、九成。至於超雲命格屬土，今年行緊桃花帶夫星，兩人夫妻宮本質暗合，結合應該冇乜人阻止，相信會喺2014年開花結果。