盂蘭勝會鬼門關大開，夜蒲愛Wet之人固然成個農曆七月都要小心啲，但據玄學家方海閱師傅講，就算晚晚匿喺屋企打機上網嘅宅男，唔出街一樣有機會惹上陰魂。5招拆解，唔止教你有所避忌，仲順便幫你去埋毒㖭。
記者：徐影龍
攝影：林栢鈞
Model：傑仔、Rika@GME
鳴謝：玄學家方海閱師傅（21441514）
方師傅話就算宅男唔出街，鬼節期間亦要謹言慎行。
1 眼球Cam心難安
方師傅本身對數碼產品唔算好熟悉，問到宅男有乜須要避忌，起初都無乜頭緒，但一講到宅男大多酷愛通宵上網、打機、睇鹹片，方師傅即時大把嘢講：「首先電腦周邊唔好同邪惡、凶靈有關，好似骷髏頭形喇叭、Webcam等，尤其係眼球形視像鏡頭，又圓又凸嘅就更加唔好用喇，事關晚上燈光昏暗時，會好似有隻眼望住你咁，就算你無唔舒服，其實心理上已受影響，難以心安。」
教你化解：換可愛Cam
可揀選一啲方形或動物類Webcam，自用或女仔都啱使。
2 鹹片耗損元氣
方師傅一直在強調，做愛、自瀆同樣會耗損元氣，令陰氣有機會入侵，若然宅男慣性日日睇鹹片、一條友熄晒燈匿埋「起機」，會令到陽氣低無可低，咁有「誠意」，陰間朋友唔同你打招呼都對你唔住啦！
教你化解：雷凱欣下火
推介《3D肉蒲團》，睇雷凱欣男聲演繹兼會爆炸，包你道火出晒嚟，唔會再有任何歪念。
3 恐怖Game嚇自己
方師傅一早話過鬼節唔好聽鬼古、哀怨嘅歌，玩須要動腦筋嘅恐怖Game、大幅度投入，更係可免則免。雖然買少見少，但《零》、《SilentHill》等純驚嚇Game，仍然Keep住推出，除咗會被突如其來嘅音響效果嚇親外，好似《零》呢類揸相機周圍拍攝靈體嘅玩法，擺明挑戰靈界，簡直係「撩鬼攞命」。
教你化解：正氣憤怒鳥
改玩人氣HitGame《憤怒鳥》，主角可愛顏色又鮮艷，更可鍛煉腦筋，夠晒正氣。
4 徹夜打機傷神
咁多人打OnlineGames，就係因為方便約腳煲Game，一班人合作過關，打打吓不知不覺就天光。呢項避忌等於話「阿媽係女人」，個個都知通宵打機對身體唔好，但方師傅補充：「半夜三更人嘅精神已經唔係咁好，仲要長時間繃緊，又或突然響起爆炸聲，在心理上更係一項好大負擔。」俗語所謂嚇到三魂唔見七魄，就係咁解。
教你化解：早睡早起身體好
早啲瞓啦，毒男！
5 大吉利是PK相
早排facebook好興嘅「PK相」、「跳樓相」，人影你又影，一窩蜂齊齊PK，好似好熱鬧好得意，若果被老一輩嘅人睇到，肯定向你吐口水跟住講句「大吉利是」！方師傅仲提醒大家，唔好喺夜晚、陰暗位亂舉機影相，事關鬼節中有大量靈體出現，唔覺意將佢哋變成Model，咁就大家都唔好喇。
教你化解：日頭舉機影
喺光天化日下，扮吓龍友影吓龍相咪好囉，話唔定同夢中女神有發展機會呢！
