做傢俬嘅敏華（1999）上周五晚出通告，話主席黃敏利用283萬銀增持咗50萬股。雖然話事人增持公司股份唔算係咩新鮮事，周不時都會喺港交所（388）網站權益披露一欄見到，但奇就奇在黃主席好似好想將最新嘅倉位盡快公告天下，連T+2都等唔切。
唐牛Check番，黃主席6月下旬增持敏華時，都有每日出通告Update大家；佢喺9個交易日內用3176萬銀掃咗4球幾貨，持股量由61.33%升到去61.79%，雖然數量唔算多，但期間敏華股價就好似坐火箭咁，由6.46元爆上8.58元，累積最多升咗33%，大幅跑贏同期恒指約3%嘅升幅。心水清嘅戰友，當時有做「一致行動人士」嘅話，真係肥過肥仔水。
唔知係咪主席再次出手，敏華上星期五單日升咗7.3%，收5.73元，比起之前平咗一大截，唐牛決定短炒一轉，現價買入，博黃主席繼續增持，目標價7元，跌穿近期低位5.30元止蝕。
唐牛