五礦建設（230）股價質到阿媽唔認得，提供長線收集機會。五礦建設係五礦集團嘅地產上市旗艦，而阿媽五礦集團又隸屬國資委直接管理，講來頭背景，已經超班。而五礦建設話明係旗艦，對佢未來業務市值再壯大，又有憧憬。又五礦建設現金高達33.7億銀，淨借貸得7億銀，淨借貸比率得11%，講財政，亦fit到爆。再講，五礦建設家陣PE得6倍單位數，而上年底止，集團嚟自內房嘅預售收入，已經上到21億銀人仔。今年上半年，集團內房預售收入，上扣26億銀人仔。預售成績靚爆鏡，嚟緊日子業績，繼續有睇頭。呢轉五礦建設再質穿1蚊收集，擺長線，博升1倍樓上到兩蚊，連重秤後NAV折讓，仍然高40%。
新華製藥NAV折讓大
山東新華製藥（719）1年累積跌咗四成，現價（2.23元）嘅PE，跌到得番8字頭單位數。就當集團今年度純利，完全無增長，呢個PE水位，都係平。又集團家陣NAV約4.4元，現價折讓達到49%，醫藥股當中，山東新華製藥折讓之大，又係數一數二。呢轉冷吼博升兩成到2.67元，集團未有耐上到NAV水位。
錢雋