家香港樂壇市道不景氣，搵食越嚟越艱難，但係班創作人又唔的起心肝做好啲音樂，反而成日俾人發現左抄右抄再包裝成一首新歌，之前Mr.有幾首歌都俾網民發現有抄襲之嫌，近日天后容祖兒（Joey）嘅派台歌《花千樹》又俾高登仔發現疑抄襲馬浚偉94年嘅舊作《不再悲觀》，當中副歌部份真係似到十足十。
網民惡搞混合版
其實馬仔首《不再悲觀》由張宇作曲，而Joey首《花千樹》就由MattewTisher同AndrewAng創作，《不》仲由張宇親自演繹國語版《情有獨鍾》，所以Joey國語演繹《最後情人》（即《花》國語版）自然都有抄襲之嫌；班高登仔好快手整咗個七國咁亂版放上youtube（ http://www.youtube.com/watch?v=2H8F1vUp1vQ），真係好鬼有創意。
Joey經理人霍汶希噚日喺電話回應：「無論廣東歌、國語歌或外語歌，經過咁多年有相似唔出奇，唔可以話抄歌，咁對作曲人唔公平。」