上任一個月嘅醫管局人力資源主管區結成醫生，筆名區聞海，係好多粉絲嘅專欄作家，亦係另一名筆區樂民嘅哥哥。區醫生噚日同傳媒茶敍，被問到區樂民筆下經常提到嘅「三叔」，到底係咪真有其人？區醫生笑言應承咗細佬唔講得：「我只會話佢入面講嘅都係真有其事。」
兩兄弟持相反意見
區聞海係內科醫生，80年代由美國布朗大學回流香港，最初喺難民營行醫，之後加入公立醫院，前老闆包括現任局長周一嶽。當年周一嶽係威院骨科醫生，區聞海亦先後做過伊利沙伯醫院同律頓治醫院，又喺九龍醫院開設復康服務，後來做埋九龍醫院院長。
喺醫管局做咗咁多年，家仲去埋總部做人力資源主管，區聞海話喺局方嘅政策層面，好多時同喺私家執業嘅區樂民持相反意見，例如最近醫生工會極力反對醫管局免試招聘有限度註冊嘅海外醫生，阿哥贊成，細佬就反對。