廖碧兒當日媾掂李澤楷表弟林忠豪，以為可以飛上枝頭變鳳凰，可惜近日有傳兩人玩完分手收場，廖碧兒走投無路下有意翻撻舊愛陳豪，但陳豪現有陳茵媺在手，當然唔吼廖碧兒。難怪前晚廖碧兒和助手到中環shopping解悶，人財兩失的她面對鏡頭惟有強顏歡笑。
去年尾廖碧兒搭上林忠豪，即時飛起舊愛陳豪，兩人被拍到一同歸家享受二人世界，難怪廖碧兒一早叠埋心水嫁入豪門做少奶奶。好景不常，廖碧兒和林忠豪的戀情只維持到短短半年，近日有傳兩人已分手，人財兩失的廖碧兒即時想翻撻陳豪，但陳豪和陳茵媺現正發展中甜到漏，故當然唔吼廖碧兒，難怪她前晚拉着助手到中環shopping散心。
披頭散髮甚狼狽
當晚廖碧兒和助手到置地一時裝店揀衫，她全心全意地揀衫，其間睇中心頭好入試身室試衫，試完走出試身室發現記者在場拍照，廖碧兒即時擠出笑容付款，其間更不停講電話，卻搞到自己披頭散髮相當狼狽。當廖碧兒離開時裝店時記者上前影相，問到是否和林忠豪分手？廖碧兒未有否認：「哈哈，做嘢先呀。」但失去大水喉射住，供樓和經濟會否有壓力？她支吾以對：「冇壓力，OK嘅，thankyou，拜拜。」
此外，Roadshow前主持梁慧恩（Viann）前晚與未婚夫林忠澤到會展睇《猿人爭霸戰：猩凶革命》首映禮，對於堂兄林忠豪近日被指撇甩廖碧兒及搭上人妻新歡，Viann先澄清說：「喺公司睇完報道都笑咗，係失實報道，冇根據同九唔搭八，所謂人妻我都識，人哋唔係圈中人，要幫佢澄清，唔好傷害佢，佢有小朋友有家室。」
林忠澤：好敏感
至於林忠豪是否已經與廖碧兒分手，林忠澤就有口難言說：「嘩，好敏感呢個話題。」Viann即解圍表示不是當事人，所以不方便說太多。
採訪：彭琮然、文國駿
攝影：陳慧安