世上不但有「愛車之人」，相信也有「愛車之魂」，否則也不會在親友離世時，專誠買部紙紮靚車燒畀佢。踏入農曆七月十四，又係鬼門關大開的時候，各位往生朋友會否揸住你送畀佢嘅愛車回到人間自駕遊呢？都係講吓笑啫！
記者：蕭漢祥
攝影：王文忠（部份相片由受訪者提供）
Model：梓菕
精緻紙紮藝術
大家一睇今日的介紹，可能會話：「搞錯呀！車版講紙紮車，大吉利是！」但大家又諗深一層，好多愛車之人離世時，大家為表心意都會特別為他送上紙紮車，好讓他在另一個世界繼續享受駕駛樂趣。而香港市面上一般的紙紮車，大約四至五百蚊部，手工也屬一般；不過時至今日，想買部手工精緻靚到似足真車的紙紮車，可以上網訂購。
在現實世界，每間車行只會代理某幾個品牌汽車，但這間台灣專營殯儀祭品的公司，就可以代理所有品牌，簡單來說就係度身訂做，只要想要甚麼品牌、甚麼型號均可。最特別之處是用料及手工遠勝於傳統紙紮車，像真度十分高，例如車外殼用上多種顏色及厚度的卡紙，就算透明車窗位置都用上由粟米提煉而成的物料，既美觀又環保；而中控台跟原車一樣設計，波棍、冷氣、死火燈，一切擺設跟足，大家一睇都估到係乜品牌及型號。
5大受歡迎型號
呢間台灣公司雖然香港有分店，但所有製作只在台灣進行，製作時間約兩星期，完成後空運到港。在芸芸作品當中有幾款特別受歡迎。
No.1
三角星開篷車
自古以來，呢個品牌都被祭品界選為紙紮車的設計對象，不過以前除咗個標誌之外，車身無一Part似原車；但今次像真度極高的開篷Sporty版，不但夠Update，內櫳手工仲非常精細，夠晒得體。
No.2
復古綿羊仔
對於喜歡電單車的往生者，要送上紙紮電單車祭品可以話無咩選擇。不過這家能製作有如模型的紙紮車，電單車又點會難倒佢呢？其中某品牌復古的綿羊仔，不單止顏色鮮艷，而且仔細程度十分高，同樣非常搶手。
No.3
泥頭車
祭品之中，有人送紙紮跑車或名車，但對於一生鍾情於、甚至終生與貨車為伴的往生者，可能送泥頭車夠特別，亦都夠貼切個人性格，且更可能希望他到下面可以組織一支運輸團隊繼續搵食。
No.4
野狼戰車
除了綿羊仔是電單車愛好者的選擇，還有台灣經典系列的野狼125，售價於二千元以下，作為祭品化算而特別。
No.5
環環戰跑
其實送贈名車背後的意義，是希望離去的朋友享受到在人世間時未有的駕駛樂趣，所以往往現時人世間流行的品牌，都會成為祭品的選擇，這部真實版索價百幾萬元的跑車，紙紮價二千幾蚊就可以享受到！
查詢：艷遇堂
網址： http://skea.com.hk/
香港生命集團
網址： http://www.hk-lifegroup.com/