終極打蠟套餐　$7,380有米保養

愛車之人，定時定候都會為愛車扮靚，通常每半年都為它打個靚蠟令車身夠BlingBling。不過坊間洗車屋打蠟往往花約千元，仲要未必一定Bling足半年。如果有個車身護理貴七倍、但耐用時間高十倍，呢個終極套餐又可否吸引到你呢？

記者：漢祥　
攝影：王文忠、孔慶為
Model：TiffanyWong@Elite

日系納米夠矜貴

打一個蠟要幾多錢？相信每位車主都識答：「大約六、七百蚊，貴極頂多三千蚊！」假若話你知，終極打蠟索價七千多元，你會點？唔係話，支蠟水鑲鑽石呀？鑲鑽石就唔係，但稱為DiamondKeePre是這間日式連鎖洗車屋的極品車身護理套餐，價錢以汽車Size分級，Size最細至最大的收費分別由$5,380至$7,380，一共五個級別。究竟這個車身護理有甚麼矜貴之處，收費可以冠絕業界，原因都不外乎科技先進，還記得個廣告「納米……係十億分之一米咁細」，除用來護膚及洗衫之外，呢個技術用來修補車身花痕就最掂。

持續五年閃亮

DiamondKeePre係日本最高級的車身塗膜，以兩種化學元素二氧化硅及氟，再用納米技術製成，具有強力的撥水性、防污性、防靜電、防紫外線等功效。但最吸引的是，一般打蠟都只是維持到半年左右，更短的比比皆是。而呢間洗車屋稱經過護理後，可以持續五年保持亮麗光澤，即係耐用時間長十倍。原來唔止靚，仲好耐用。

日系洗車管理

幾年前打入香港市場的KeePreProShop，他們全線洗車及護理用品都係日本貨，對於向來崇日的香港人來說，信心真係高一截。一般在KeePre做個普通全車護理都要二千元，比起平時街邊舖仔洗車店貴一、兩成，原因係咩？除可能因日圓滙率高企，相信是貴在他們的日式管理吧！就算係洗車，佢哋都有課程教導員工，更會安排員工遠赴日本接受為期兩個星期的訓練及考試，仲要有證明學有所成，真係洗車都有出頭天。