方力申在電影《戀夏戀夏戀戀下》中，與一班比堅尼女郎合作，當中包括暴乳女神張馨予，看似艷福無邊，小方也有一剎那龍友上身，對拍檔狂影一番，但不到數天，小方竟嫌棄索女表示睇到厭。
方力申近年專注拍劇及電影，剛剛拍畢黃柏高（Paco）有份投資的電影《戀夏戀夏戀戀下》，這是Paco離開金牌後首個搞作，小方說：「可以同Paco再合作特別開心。」
龍友上身搏命影
電影在海南島拍攝，小方能邊拍邊享受陽光海灘之餘，還有一大班比堅尼女郎相伴，認真艷福不淺。小方直言最初也覺得有着數，他笑說：「開頭幾日真係成個龍友咁，拎住部相機係咁影，但影多幾日，原來真係會厭囉，比堅尼啲款式來來去去都係嗰啲款，原來真係唔可以成日睇囉。」似晒命多過嫌棄，難為那些龍友要付鈔請模特兒才有機會拍攝。
電影講述宅男小方追求心中女神，戲中女神正是人肉速遞到港的吳卓羲女友張馨予，小方跟張馨予還有咀戲，小方說：「好榮幸可以得到佢嘅螢幕初吻。」問佢現實中的女神是否女友鄧麗欣（Stephy），他說：「冇女神呀，唔講呢啲。」
北上拍劇苦相思
與Stephy感情生活如何？小方只表示一切穩定，稍後他又要往北京拍劇3個月，又要與情人分隔兩地，小方說：「要搵食冇辦法啦，有機會就要做，香港未必有咁多機會拍劇，始終電視台有自己演員。」
採訪：胡比 攝影：陳慧安
場地：Terminicafe
髮型：VincePangofILColpo（TST）
化妝：YenLai