仲記唔記得替補機制？仲記得政府就替補機制做緊諮詢嗎？唔記得，正常，暑假悠長，懶理政事好正常。「沙田泛民」噚日冒住酷熱天氣警告去下亞厘畢道政府總部抗議，反對政府霸王硬上弓修改法例取消補選，更形容機制係「人權墳墓」，葬送香港人參選權、投票權。
佢哋戴咗個道具去中環示威，係個紙製山墳，上書「投票權之墓」，諷刺曾蔭權剝奪港人選舉權。抬棺材、墳墓向來係古思堯強項，「沙田泛民」都有樣學樣，而且紙山墳似模似樣，八方讚帶隊嘅蔡耀昌，呢次抗議算幾有heart喎，佢唔邀功，話係集體智慧，「大家一齊諗出嚟嘅」。至於個紙墳墓，則係一個街坊「傑作」，蔡耀昌謙稱同阿古出品比較，呢個墳只係「小學雞」程度手作仔，勝在價廉物美，好使好用。