娛圈08年爆淫照事件，男主角陳冠希（Edison）同張栢芝嘅淫照搞到滿城風雨，佢哋早前機艙破冰合照，更成為栢芝同老公謝霆鋒離婚導火線。
抄警服誘惑
栢芝嘅淫照雖然好唔吉利，但多年嚟直認迷戀霆鋒嘅內地女模李美熙，近日竟模仿栢芝擺淫照甫士，兩名男對手仲係喺模仿騷出身嘅山寨版霆鋒同Edison。李美熙呢批相近日喺網上流傳，不過論大膽尺度遠遠唔及淫照，相中嘅李美熙雖着警服誘惑老翻Edison，但解鈕下仍戴住黑bra，影得一啲都唔徹底，令人睇咗得啖笑。反而老翻霆鋒個樣同真人一樣咁chok，幾可亂真。
栢芝認任性
栢芝早排應now101台邀請去米蘭拍攝節目《Lifetival》，去體驗做model，仲周圍觀光。
栢芝承認自己未做人阿媽好任性，家就改變好多，佢話：「係我將囝囝帶嚟呢個世界，我要負責任。」佢又話︰「等佢哋大啲，我會解釋畀佢哋聽，就算遇到幾大挫折都可以爭取自己嘅生命同目標，唔好輕易俾人打敗。」
另外，栢芝有份主演嘅電影《無價之寶》噚日喺北京搞宣傳，但未見栢芝撐場，王晶唔擔心鋒芝婚變影響票房，佢話：「這部片可能是Lucas滿18歲前最後一部戲，霆鋒希望兒子學業為重，大家應到戲院支持栢芝母子。」