曹格曾經同老友側田因醉酒搞出大頭佛，好彩最終和氣收場，自此曹格承諾會飲少啲，不過有時盛情難卻都要飲少少應酬吓。好似日前曹格同啱啱加入bma嘅師妹李幸倪（GinLee）一齊嚟香港做嘢，老闆羅傑承就請佢哋去中環食晚飯，同場仲有老闆娘梁芷珊，四人言談甚歡。
投契玩手機
當晚羅傑承開咗支靚紅酒請曹格同Gin一齊嘆，雖然曹格之前話咗會飲少啲，但老闆做東，佢都二話不說大啖大啖嘆紅酒，不過都係一杯起兩杯止，Gin就保持儀態淺嚐幾啖。其間曹格盡顯大師兄風範，同Gin密斟交流，可能過幾招指導Gin唱歌，佢兩個傾得好投契，仲攞住個手提電話一齊玩。
啱啱簽bma嘅Gin日前喺新城國語力頒獎禮攞咗兩個獎，家已密鑼緊鼓搞新碟，羅傑承都好睇重佢，預計會花千萬力捧，Gin近日已推出新歌《廢話少說》，製作班底係EricKwok同林若寧，咁啱同Gin勁敵林欣彤首處女作《洗澡》嘅班底一樣，而佢兩個今年會先後出碟，呢對宿敵嚟緊會喺音樂頒獎禮上力爭新人獎。