個市呢幾日跌到一仆一碌，噚日叫做好番啲，點知港交所披露易網站死機，幾隻大藍籌無奈停牌。一波未平一波又起，南北韓嫌個市未夠亂，竟然喺呢啲時候互片。華華突然諗起，年初，搵李丞責預測今年個市時，佢已經批死今年係南北韓衝突最勁嘅一年。
華華當然即刻搵丞丞師傅，睇吓有乜啟示。「年初時講，投資最佳月份係新曆7至9月，即係代表可以趁低吸納，我自己喺低位都有入貨！」呢啲時勢都咁勇？「個市去到農曆8月，就會反覆向上，有機會可以追入，之後會漸入佳境。」不過，丞丞師傅話，呢兩個禮拜好關鍵，「因為新曆5月後至9月前，受到2黑5黃影響。去到農曆7月21日太歲誕，會最波動。」農曆7月21日咪即係下個星期六，好彩冇市。
立秋後算賬，除咗丞丞師傅命中率高啲之外，蘇民峰年初都話沽貨位係新曆8月8日（周一），雖然周一嗰日因為美國評級被降，個市一開已經跌，但嗰日識沽貨，應該都執番身彩。蘇師傅噚日同華華講，「8月8號係一個分界，10月8號、11月8號仲會出現界線，下半年會跌。」大家今次就要學精，咪等正日先嚟沽貨喇！
咁港交所死機單嘢又點睇？丞丞師傅話，港交所財位喺東面，即係新政府總部嗰邊，家陣嗰邊動土，個勢會弱啲。不過，蘇師傅話：「正式入伙後中環會好啲，但仲有其他中環填海工程。港交所屬水，今年表現最差，出年水就會轉好，家可以撈定底。」
華華最後都要講句，玄學嘅嘢唔係精確科學，只可以用嚟參考。
李華華
mailto:[email protected]