英超球星中，朗尼、林柏特等就出名係好爸爸，不過史篤城嘅翼鋒賓納（圖）就係衰老竇代表；賓納上年5月同懷孕嘅女友蘿拉（LaraMurphy）訂婚，上年8月囝囝Trey出世，諗住一家三口樂也融融。點知賓納好快就貪新忘舊，今年已經同27歲嘅蘿拉分手，6月又去咗整容，整走對兜風耳，咁就當然想再戰情場。好快佢就搭上25歲模特兒艾莉絲（AliceGoodwin）。原本男歡女愛，賓納都唔錯得晒，但佢媾女媾到連個仔都唔記得，最近囝囝1歲生日，佢冇出席生日會，寧願留喺屋企同艾莉絲雙宿雙棲。賓納做咗英超陳世美，拋妻棄子，球場踢到識飛都冇用啦！