09年東亞運港足歷史性奪金，唔少人以為球壇將有一番新氣象，點知本地波水平不進則退，連甲組球會租場練波都被康文署針對；足總董事伍健（圖）就喺個人網誌度發火批評當局冇顧球隊需要。前日足總例會上傾到康文署優先借場失約嘅懲罰準則，原來用家想取消借用，要有40日通知期，否則會被書面勸喻，屢勸不改就可能被重罰1年內喪失優先訂場權。Ken哥聽到後鬧政府唔了解球圈運作，舉例有隊波禮拜日踢足120分鐘，雖然一早book場喺星期一操練，但教練體恤球員想臨時取消點算呢？政府聲稱要搞好足運，家就連球隊練習都要諸多阻撓，睇怕要令本地波起死回生，都係得個講字。