【本報訊】香港國際機場成為露宿者家園，社區組織協會幹事吳衞東曾接觸過部份機場露宿者，了解他們選擇在機場露宿的背後原因，「佢哋覺得機場乾淨啲，方便每日冲凉」。他指露宿者也是為勢所逼，批評部份輿論帶有色眼鏡歧視他們，「露宿唔係犯法，如果咁都要清場趕絕佢哋，係好唔合理」。
吳衞東表示，機場由於洗手間地點方便與地方寬敞，所以部份注重衞生的露宿者，會選擇在機場露宿，而且甚少會向旅客行乞。
「只係唔想俾人搵到」
他說：「露宿者其實只係想隱蔽，唔想俾人搵到，好少會去騷擾其他人」。現時全港有超過1,000名露宿者，過半數本身有工作，「露宿者好少行乞，家行乞嘅反而多數係內地雙程證人士」。他說露宿者選擇露宿，各有不同原因，「有人可能係避債，有人可能係冇錢租屋」。他指不少露宿者是月入只得三、四千元的散工，「搭車、食飯樣樣貴，邊可能租到屋？」他指現時一個沒窗的板間房，月租1,200元至1,400元不等，「家三十幾度天氣，你叫佢點瞓喺入面？好多人咪寧願瞓街」。