英國暴亂持續多日兼蔓延多處，趨勢似有禍延體育界！正喺英國南部WeymouthandPortland（韋茅斯及波特蘭）提早完成比賽嘅香港滑浪風帆「1姐」陳慧琪，本想早啲回港，可惜冇機位下被迫喺南部多留幾日，要到下周日（14日）先返港。而原定昨晚喺溫布萊舉行嘅英荷足球友賽因暴亂早早取消，但兩百米之隔嘅世界羽毛球錦標賽卻繼續比賽，但係參賽球員就人心惶惶；同樣喺英國比緊賽嘅傅家俊喺微博寫話：「家返到發生騷亂嘅倫敦，有點害怕。」
林丹：唔會一個人出街
今次世羽賽有唔少潛藏危機，由於球員住嘅酒店同溫布萊體育館只係數分鐘之隔，大會冇為球員預備接駁車，球員只能步行去場館，有成3男5女嘅香港隊，都係日日行過去。港隊總教練何一鳴原來到埗後已向球員嚴厲聲明，一定唔可以四圍走，佢噚日話：「其實由酒店步行去場館只係兩、三分鐘，呢度街上暫時冇乜嘢，但已提醒球員唔可以四圍去，出街食飯都一定要成班人一齊，唔可以單獨行動。」中國羽壇「1哥」林丹平時cool到爆，噚日都講到明唔會自己一個人出街。好彩香港「1姐」葉姵延冇俾騷亂影響心情，噚日喺世錦賽女單第2圈以2:1贏加拿大嘅李文珊。
陳慧琪冇機位要「滯留」
除咗香港羽隊外，港滑浪風帆嘅陳慧琪同隊友鄭國輝，前日喺英國南部WeymouthandPortland參加完奧運測試賽，各得第13及第19名，入唔到今日嘅「獎牌賽」，於是想改機票，點知冇機位，暫時要「滯留」喺英國。
香港桌球壇「1哥」同老婆Shirley都身在英國，前日喺Gloucester（格洛斯特）打了一個世界排名賽（PTC第2站），可惜第一圈以2:4輸俾GaryWilson，但佢未返得香港住，因為今個月19號要轉戰設菲爾德另一排名賽（PTC第3站）。