上周有行家率先喺自己嘅博客「公佈」，蔡東豪（Tony）會喺《蘋果日報》開版。其實，呢幾日已經見財經版出廣告，話下周一開新版，華華即刻搵Tony問清楚。佢話新版叫《金融中心》，逢周一至周五見報，風雨無間。
無啦啦孭個版，都算破天荒。Tony話，多得肥佬黎畀個版任佢舞，所以搵埋幾個志同道合嘅朋友，包括《明報》經濟版前高層同《經濟日報》助理總編輯一齊，睇吓可以搞出啲乜。
版名叫《金融中心》，內容講啲乜？華華唔問猶自可，一問Tony就收唔到口，「我認為金融中心係好能夠代表香港，一個好可貴同好美麗嘅地方，因為金融中心最能夠表現到香港『能者居之』。你留意金融中心，冇地產霸權、冇發水，富豪唔會參與呢個行業。呢個地方你要憑自己嘅實力，你要打低對手，你要做得好過別人，先至可以站得住腳。」
驟耳聽好有heart喎，但華華聽聞，Tony搵咁強嘅陣容，背後另有圖謀。
未等華華開聲，Tony已經話，「出面有人傳我哋想整個港版嘅MuddyWaters嘛！」咁係唔係吖？Tony話，好多人都鍾意將事件諗到好複雜，世事嘅嘢其實往往都係好簡單。又睇吓係咪如佢所講！
李華華
mailto:[email protected]