【本報訊】英超開鑼在即，不過幾支列強均有主力有傷在身，錯過揭幕日賽事，難免有些失色。
矢志重返Big4行列的利物浦，隊長謝拉特於3月接受鼠蹊手術，獲領隊杜格利殊恩准今夏留英休養，未有隨隊東來廣州和吉隆坡「搵真銀」，不過紅軍上月底公佈，「謝四」最快要到9月中才有望復出，料將缺席首3輪賽事，包括下周六（20日）作客阿仙奴的硬仗。
保頓連接損兵最黑仔
曼聯墨西哥「小豆」查維亞靴南迪斯上月訪美時發生意外，操練期間撞傷腦部，出現腦震盪，令紅魔球迷非常憂心；「小豆」留院接受觀察後，證實無大礙，惟要唞兩個星期，聯賽首輪作客西布朗只能做座上客。
強隊傷一個都已經叫苦連天，上屆成功護級的保頓情況更慘，一周內先後有南韓中場李青龍和新加盟的米亞斯斷腳，前者未開季已宣佈提早收「咧」；後者樂觀估計明年3月復出，屋漏兼逢夜雨，另一中場賀頓因右膝受傷，雖已復操但未有態；保頓8、9月硬仗連場，主場硬撼曼市雙雄，作客則惡鬥利物浦和阿仙奴，認真惡搞！