有本地「卡王」美譽嘅恒生銀行（011）執行董事兼個人銀行業務主管梁永祥（圖），做埋今年底就離開服務多年嘅恒記。該行噚日公佈，梁總因個人事業發展而呈辭，本月20日起辭任執董一職，其他職務就到今年底止。不過，恒生暫未公佈接班人選，華華估日內就會揭盅。
94年獲恒生前副董事長兼行政總裁歐肇基禮聘，加盟本地第三大銀號嘅William（梁之洋名），先後同鄭海泉、柯清輝及梁高美懿等恒生大班合作，佢同華華講，「好榮幸可以喺恒生服務17年」，即將離開，真係好唔捨得一班多年來並肩奮鬥嘅同事。
咁點解又離開呢？梁總不愧為高手，佢話公佈咪講咗要尋求個人事業新發展囉。以華華所知，William周身刀，29歲就任美國運通信用卡首位華人信貸總監，31歲做到渣打信用卡主管，恒生任內又首創信用卡cashdollar積分。佢對本地藝術界亦貢獻良多，更因此獲特區政府頒發銅紫荊勳章。