巴塞隆拿嘅阿根廷球王美斯除咗踢波叻，冧女都有一手，近排佢同女友安東蓮娜成功復合，而且仲齊齊上遊艇玩。而佢喺同安東蓮娜纏綿之後，仲嘆番口事後煙㖭！
吸煙手勢證煙齡不淺
日前返咗巴塞進行季前操練嘅美斯，一向畀人乖乖仔嘅形象，但喺打美洲國家盃之前，就俾阿根廷傳媒踢爆原來係鹹濕仔一名，喺布宜諾斯艾利斯一座高級公寓內有個私竇，仲成日約埋米列圖兄弟同埋班豬朋狗友開淫亂派對。咁都未算，佢打完美洲盃後約埋巴塞嘅巴西籍隊友丹尼爾出海度假，點知又出事。
成班人出海游水曬太陽，本來係好健康嘅活動，但就俾美斯一個行為搞到唔健康。美斯喺赤裸上身曬曬吓太陽嘅時候，突然攞條煙仔出嚟食。睇佢含煙個樣，應該唔係最近先有呢個不良習慣，估計佢嘅煙齡應有番咁上下，而且食煙個樣，仲同影帝張家輝有分似㖭。
保方朗尼施丹出名煙民
啲狗仔隊除咗成功揭露美斯係煙民之外，仲踢爆佢原來同先排分咗手嘅女朋友安東蓮娜復合。身穿白色吊帶短裙嘅安東蓮娜，喺遊艇上同美斯煙韌完之後，之後就除咗條裙，但大家咪心邪，佢身上有三點式泳衣。睇嚟美斯呢支煙，九成九係同安東蓮娜親熱完後嘅事後煙。
美斯先排被傳成日同阿根廷啲肉彈模特兒同埋明星鬼混，家陣佢同女友安東蓮娜喺番埋一齊，對佢同巴塞嚟講絕對係好事。至於佢俾人影到煲煙，作為一個運動員，食煙當然係唔啱，但講真，球壇有唔少世界級球員係煙民，好似係意大利龍門保方、英格蘭前鋒朗尼、德國中場奧斯爾，同埋幫法國贏過歐國盃同世盃嘅退休球王施丹。
只要唔影響喺場上嘅表現，相信巴塞隆拿教練哥迪奧拿亦唔會因呢次事件而捉佢去照肺。但點到好，寧畀人知，莫畀人見，美斯始終係球王，食煙始終有損形像，希望佢經過今次之後，會學精啲啦！