屈師妹為三女之母，教女費盡心機，自嘲係「怪獸家長」。呢日在飯局見到疑似特首候選人，講到時事，佢盡情訴苦，要求未來疑似特首有朝一日真的成為特首嘅話，要注意本港教育問題──主要係本地學校之循環死結，即校長逼老師，老師逼學生，學生回家令家長嘔血，令到家長成為怪獸，校長點解要逼？原因簡單不過，學校成績不好，學生不來，教育局把大刀殺下，校長與教師人頭不保，齊齊失業，為了飯碗，校長如何不急？而香港家長專以學校成績為子女選擇學校，對冇乜功課做嘅學校全無安全感，怪獸係有自虐狂嘅，唔見血唔高興吖嘛。
疑似特首候選人就講佢嘅睇法，但一聽就知道與本地怪獸家長搭不上線，因為佢三位仔女皆在英國讀書，吸取國際視野。在座嘅建築師F話自己出身野雞學校，讀書靠自己啫，未必靠學校，又指出外國學校（公立）根本好唔過香港官津校，港人唔需要過份責罵本地教育，才女T就為本港嘅大學辯護，話本地大學生都有國際視野，質素甚高。
呢啲問題，好難一時之間講得清楚，但好似疑似特首候選人咁嘅做法──送子女到英國，十分普遍。中大校刊（二○一一年第一期）訪問前校長劉遵義，劉校長講出佢一個觀察：「內地來港學生都是從全國千中選一的精英。本地大學由於一些因素，吸引不了香港最出色學生入讀──不少受過大學教育的香港父母，都把子女送到英美大學（過不多久可能也會送到內地頂尖大學）。只有專攻法律和醫學的，囿於這兩門專業有保障本地培訓人才的制度，才會留港求學。如果香港的大學連本地精英都留不住，說甚麼卓立於國際都只是空談。」
劉校長所言甚是。呢，上星期五講嘅鐘錶L送子入哥倫比亞就係一個例子，有咁啱得咁蹺，律師C個女與珠寶L嘅二子又係今秋入哥倫比亞，據珠寶L講：「我細仔參加香港哥大新生聚會，問一問，原來位位都係本港國際學校、加拿大中學、美國中學嘅學生，冇一位在本地中學畢業嘅！」