禁毒宣傳片宣揚「take嘢衰硬」，末代會考生阿Ken成績單上連F級亦欠奉，家住屯門的他無心向學，自15歲起，飲酒吸煙已是等閒，一年前開始索K：「以前喺屯門間中都有索K，識咗班friend咪出九龍飲酒囉！成日都心思思想玩番（K仔），問佢哋，佢哋就介紹我去先達攞，仲話啲嘢又平又純。」
先達廣場人來人往，警察也多，阿Ken坦言買K一步一驚心：「我幫襯玩具舖半年，頭幾次去真係好驚，上到三樓好似有幾十隻眼望住，心諗俾人拉咗呢世就玩完，但攞多幾次好快就習慣。開頭每次買一包分兩次食，都係100蚊，之後『壇數高咗』，每次要索兩、三包先夠喉，索完特別大膽，飲埋酒仲勁，有次試過喺酒吧同人嘈交再開拖（打架），跌落地成手損晒都唔覺痛，後來玩到冇錢玩，介紹朋友去買，夾錢食。」
被母發現 決心戒掉
曾經無K不歡的阿Ken最後決心戒毒，全因親情：「有次玩淨包K放喺褲袋唔記得拎出嚟，阿媽洗衫發現咗，成家人係咁鬧，阿媽喊足成晚，當時突然覺得自己好不孝，諗番上堂時又冇心機，個人越食越戇，做咩都冇精神，諗清楚決定戒咗佢……家仲係成日要去廁所。最想同之前畀我介紹去先達買K嘅舊朋友講聲對唔住！」《蘋果》記者