近日本港股巿受美股影響狂跌，原來百果園E神陳靜（DaDa）都蝕咗6位數字。DaDa噚日呻話：「辛苦賺番嚟啲錢冇咗一截，好肉痛。好在今朝入咗隻澳博（880），喺下晝升番啲嘅時候放咗，賺番少少。」
麥長青死過翻生
阮兆祥同麥長青今次唔使坐艇，皆因佢哋喺之前嘅金融風暴蝕到喊咁滯，祥仔仲冇咗一半身家，之後就唔敢再買股票。麥長青話：「我07年時輸咗鑊甘，之後都唔敢掂。」
Boy'z噚日去新城宣傳，成員關智斌話半年前放晒啲股票：「投資咗啲人民幣同買樓，家內地買咗層畀父母度假，香港都買咗層投資。」
蒙嘉慧噚晚喺ifc出席活動，佢話跌市前用70幾蚊入咗滙豐（005），到噚日為止係蝕咗，但佢諗住長揸，所以唔擔心。蒙嘉慧又否認早年話佢買股票蝕咗幾百萬嘅傳聞，佢仲話男友鄭伊健送咗鑽飾畀佢做生日禮物。同場嘅周汶錡就話冇買股票，但男友就買咗少少。另外，陳法拉噚日話買股票都有蝕錢：「輸嘅係有限錢，會揸住先，噚日都有趁低吸納。」