中文版《福布斯》上周公佈A股最高薪酬CEO排行榜，當大家將目光聚焦排榜首嘅平保（2318）馬明哲時，好多人都忽略咗同期公佈嘅最差CEO榜，好彩上榜嘅A股並冇喺香港上市。
榜首嗰三位分別係鑫富藥業林關羽、ST華光任松國，同運盛實業錢仁高。據統計，十大上榜CEO領導嘅公司，累計幫公司蝕咗5.77億人仔。
雖然《福布斯》話，係根據佢哋領導公司嘅業績，同支取嘅薪酬嚟排名。不過，佢哋合共只係收咗903萬人仔，平均每人年薪唔夠10萬，最高薪嘅係運盛實業錢仁高，年薪112萬人仔，最奀嗰個得10萬，平均月薪唔夠一皮，同馬明哲年薪987萬人仔相比，簡直係蚊髀同牛髀，做得差都有藉口。