屈穎妍有三位千金，三位仲係讀緊小學，照計佢與老公林超榮兩位都係有料之人，教女讀書容乜易呀，而且好似靚馬咁，馬王配馬后，生出嚟嘅馬仔或馬女，講血統唔曳得去邊呀嘛？點知屈穎妍話教女上學好有壓力，成家都精神緊張，反而林超榮啲老友記送子女去讀國際學校或直資，就成家嘻嘻哈哈喎。
有咁大分別？壓力自何而來？
師妹話：「你過時咯喎，依家比你教仔之時緊張好多o架嘞，唔講得咁多，你睇吓我本書啦！」
唉吔，於是打開「怪獸家長2孩子復仇記」，第六十頁已經好癲：「今日的父母，都把爸媽這身分當作上帝，為孩子鋪好要走的路、要說的語言、要交的朋友、學習的速度、奔向的目標……人人所學同出一轍，個個趕贏在起跑點，誰都不願落後，誰都不會落後。
我們的教育工廠，正在製造一批批一模一樣的下一代，這裏沒有百花齊放，這裏只有成王敗寇。
人家說一代不如一代，我們是一代快過一代，以前三歲上學，後來兩歲孩子都收了，現在一歲爬着進校門。
家長抓狂了，因為教育制度愈來愈瘋，家長要怪獸，怪獸逼出港孩，大家浮沉在教育漩渦中，半死不活。
如果要對香港教育還有憧憬還有奢望，我想，該是期待一場革命，我們要的不是孫明揚，是孫中山，用推翻一個皇朝的氣魄，推倒一切，從頭再來。」
有冇咁激呀，再問屈師妹：「你應該開心嘅噃？成本書嘅插圖由你三位千金畫出來，幾趣致吖，有女如此，仲話緊張？」師妹話：「敵不過現實呀，大女去某間學校面試，老師問佢有冇作品與獎狀，阿女話替阿媽畫過插圖，老師讚好之餘，跟住問：『咁你有冇圖畫得過獎呢？有冇獎狀證明呢？』哎，呢個世界唔信自己隻眼，係要信沙紙嘅！」
深層次啲睇，此乃香港過份迷信指引、規則之過，時人好投訴，老師為免有其他家長投訴，做事都特別小心，跟足指引，以免被人捉痛腳，口講無憑，有張沙紙照住，先至係免死金牌，夠客觀喎，唔係面試嘅老師主觀，甚至偏幫，更嚴重啲就係有無利益衝突呀。香港已到了不敢相信主觀判斷嘅階段，病態也。