22歲的香港模特兒王丹妮，要說的是醜小鴨變天鵝的故事，她16歲誤打誤撞加入模界，六年光景過去，小妮子由宅女變成型格潮女，年紀輕輕已走過米蘭和日本的國際天橋。前日王丹妮接受訪問時，就直言當模特兒令她有180度的轉變，讓她展翅飛翔神奇的時裝國度。
王丹妮（Louise）的外形充滿可塑性，有時像官恩娜、有時像范冰冰、有時像藤原紀香，變化之大令人嘖嘖稱奇，她認為做模特兒就是要夠多變才成功，她前日接受訪問時說：「做模特兒要乜都做到先得，着起乜嘢衫、化乜嘢妝就要似乜，唔可以只係得一個形象，因為你唔知道個客想你係點，所以要乜都識少少。」
學姐鼓勵入行
16歲在學姐的鼓勵下，參加Elite模特兒比賽，零經驗零自信的Louise竟然當選冠軍，更代表香港參加亞太區總選，又儍更更的打低36個國家對手再度奪冠，她說：「其實我本來想做時裝設計師，不過俾個高班學姐睇中，幫佢做畢業作品嘅模特兒，之後佢就覺得我好有條件做模特兒，咁啱Elite搞咗個比賽，學姐就幫我填好晒所有表格，仲send成50個email係咁叫我參加比賽。」
Louise的模特兒天份被肯定後，立即被派到米蘭工作，首次出門的她緊張又興奮：「我可以用呆若木雞形容我第一次影相，無論着住乜嘢衫、乜嘢造型，我都只係識得擺一個甫士，攝影師叫我換吓動作，但我個腦完全冇概念，嗰刻先發現做模特兒唔係淨係着靚靚影相就得，仲要學識點可愛、點甜美、點chok。」
米蘭自學英文
白紙一張，走進眾人夢寐以求的時裝王國，在米蘭逗留半年，Louise坦言學得好快，無論是模特兒工作還是溝通方面：「以前我真係一個英文都唔識，就連同房嘅外國模特兒都溝通唔到，於是買咗本英文書睇足成個月，先慢慢可以同其他女仔傾偈，家進步咗好多，溝通完全冇問題。」
Louise透露自小常被同學取笑生得高瘦及膚色黑，但當上模特兒之後，才知道這些都是先天、別人羨慕不來的模特兒身形，她說：「以前我自卑感好重，成日覺得內地同台灣嘅模特兒，好多都有經過正規訓練，但我完全冇經驗，惟有勤力啲，要做到最好先可以畀自己停落嚟，家自己叫有番少少自信心。
「我覺得自己好似醜女大翻身，以前駝背、頭髮蓬鬆、好宅，完全冇諗過可以影啲相咁靚，直頭好似唔係我咁。」缺少自信增加自己壓力，同時卻是努力自我增值的動力，Louise說：「可能我進步需要嘅時間比較耐，但我會不斷做到有人認同為止，嗰刻嘅成功感好唔同。我覺得就算有最好嘅化妝、髮型同攝影師都好，最重要都係模特兒本身，我唔想因為我而變得美中不足，所以要更加用力去做。」
嘲o靚模附屬品
對於現時模特兒紛紛轉型做藝人，Louise直言分得好清楚：「模特兒做嘅工作同藝人唔同，有啲人由模特兒轉做藝人，可能佢本身就係想做藝人，我冇諗過做藝人，最多都係做幕後，可能係做吓形象顧問之類。」
至於近年o靚模充斥市面，Louise指o靚模不是正式的模特兒，只是附屬品：「好似日本都有分模特兒同女優，大家範疇唔同都可以做得好精采，但香港就好似太鼓吹o靚模，家用highfashion做封面嘅雜誌越來越少，加上好多品牌又北移，其實香港有好多好有創意嘅人，都係等緊一個機會。」
採訪：盧妹
攝影：林德雄
Profile
英文名 Louise
年齡：22
身高：179cm
三圍：32、24.5、36
曾參與時裝騷：Chanel、Ferragamo、Dior、JapanFashionWeek、MilanFashionWeek
視母親能源發動機
走過米蘭和日本國際天橋，原以為王丹妮以哪個國際級名模做目標，卻原來是母親，她說：「我會以阿媽做目標，佢係個充滿能源嘅人，以前一個人打工養大我同細佬，家我有時唔開心打畀佢傾一陣，我就會有番晒能量。
「每次我出門做嘢，阿媽最擔心我食得好唔好、住得好唔好，有次佢仲靜靜雞放咗電磁爐、公仔麪煲、二十包公仔麪同一包珍珠米入我個篋度，點知我去到住嘅係模特兒宿舍，個電磁爐冇用過，最後仲因為行李過重送咗畀個司機，真係好搞笑。」