美股暴跌，拖累港股連上年低位18922點這個橋頭堡也失守，照道理應該全面睇淡，不過，如要強行搵個理由話大市唔係太差，就係因為牛證不停被打靶，發行商要沽貨解除對冲，因而造成跌過龍的情況。然而，如果昨日低位18786點亦都失守，即使想話係牛市都講唔出口。
倘進熊市要識博反彈
好多人話今次牛市似乎未瘋狂過，話咁快又處於牛熊生死邊緣，真令人沮喪，不過，全球齊玩量化寬鬆推隻人造牛出來，衍生隻變態熊突然來襲，扭轉過往市場規律，也不太驚奇，但既然這個牛市唔升得幾多，估計就算熊市亦唔跌得幾多，況且即使是熊市，大家也毋須過份悲觀，股市周期中升勢最亮麗的，往往是熊二反彈。熊二反彈慣性既急且勁，原因在於股市已滑落甚多而變得基數低，反彈時升幅自然看似不少。因此如真的進入熊市，重點便應是想如何博反彈，以及反彈過後如何造淡。
至於博反彈的對象則應屬曾熱炒的強勢股，但並不是在250日線上較遠的一批超級強勢股，像昨天大市一度由低位回升逾1000點，但濠賭股都跟唔上，反觀一些最近傷勢較重的如汽車股、機械股等反彈力度更強。其實有熊二反彈的原因，在於要挾淡倉，因此會主力炒起那些衰衰地，但又衰唔晒的板塊，至於長期積弱者，則因為太衰而無法挾起了。
執筆之時，德國又跌逾300點，形勢似乎非常惡劣，不過，如18786點能夠穩守，便即管掩埋雙眼，當期指假突破，待升上去再算。以18786點作關鍵位，是因為昨天之跌相對上市場是有所戒備的，因此有其標誌性，不過，組合為了減輕風險，昨天也減持了三分之一，始終在風雨飄搖的日子，不想站在危牆之下。
張士佳
寶來證券（香港）資產管理部董事
本欄逢周一、三、五刊出