評級機構標普史無前例降美國評級，引發全球股災，害到唔少股壇老貓都燒鬚，新手80後損手，實在情有可原，年輕人，唔使咁自責！
講到80後嘅投資習慣，據富達一項關於80後嘅青年理財狀況調查顯示，有97%受訪年輕人話曾經喺股海失利，究其原因，59%受訪者話因為對市場變化未夠敏感喎……華華對佢哋呢個睇法十分之諒解，事關今時今日呢個金融市場「高度敏感」，世界任何角落發生乜嘢事，都可以衝擊到個市場，即使係資深炒家，又有邊嗰膽敢話自己可以緊貼市場呢！
調查又發現，77%嘅後生仔預期自己應該會有一幢樓揸手，安享晚年；不過家為買樓儲錢嘅80後，就只有一半，其他人儲錢只為旅遊、買心頭好。佢哋只想付出少少就達成目標，咪話華華壞心腸，恐怕神仙都未必幫到手！