一沉百踩究竟係咩滋味？問吓高爾夫球壇前「1哥」美國球手活士就最清楚，佢自從09年性醜聞爆發後就冇運行，同老婆艾蓮離婚、商業贊助紛紛走人、膝傷年初又復發，今年已經冇玩兩項大滿貫賽事，最弊係兩星期前炒咗嘅球僮威廉斯（SteveWilliams）又出嚟寸佢，究竟活士惡運幾時完？周四展開嘅PGA錦標賽前景又會如何？
前球僮過檔即贏
現年35歲嘅活士生涯贏過14項高爾夫球大滿貫錦標，絕對係高球壇嘅翹楚。但自從爆出性醜聞後就一直行衰運，呢兩年佢仲有冇「獵」過女人真係唔知，之不過佢冇贏過任何冠軍就係事實，搞到佢「1哥」地位不保，世界排名仲跌至第28位，真係可算係衰到震，最慘嘅係佢日前膝傷後復出「第1擊」，日前出戰石橋邀請賽，最終只係錄得並列第37位，好衰唔衰，冠軍仲係由前球僮威廉斯「輔助」嘅澳洲球手史葛贏咗。
活士談狀態：真Nice
賽後威廉斯即刻有仇報仇，數臭活士，話跟咗活士12年，估唔到佢咁冇情冇義，話炒就炒，事前冇通知過佢，搞到佢冇晒尊嚴，好彩呢次幫史葛贏咗，威廉斯賽後「金句」就係：「這是我球僮生涯最滿意的勝利！」
究竟活士炒威廉斯之前有冇同佢傾過，真相真係只有兩人先知，因為活士周日賽後就話過有，仲話兩人對話過程係激烈啲，但絕對係「mantoman」咁傾。查實呢啲都唔係重點，因為「老虎」活士嘅球迷，最想知道嘅係究竟偶像係咪真係可以東山再起！活士就當然好有信心，多次以「Nice」形容自己狀態，佢話：「今次係一個好好嘅試驗，推桿、擊球等都做得不錯，感覺真Nice！」
喺美國亞特蘭大舉行嘅PGA錦標賽，活士話晒都贏過4次，難怪佢咁有信心，之不過呢個比賽對佢嚟講，絕對係名譽之戰，皆因佢好耐冇贏冠軍，贏冠軍自然可以出番口氣，但係贏唔到都要最少達前14位，究竟活士話自己狀態「Nice」，係真話定係謊言，周四就會知道！