無綫港姐前晚舉行完畢，得獎佳麗昨日馬不停蹄領獎。是非精季軍許亦妮被踢爆狂媾13個有錢仔，又曾被人爆料指愛誇口住比華利山和渣甸山，昨日凌晨她返回觀塘平民住所，眼見記者追訪即擺款向老竇求救，扭扭擰擰怕被睇蝕。
港姐前晚順利完成，大熱朱晨麗勝出成雙料冠軍，高妹朱希敏突圍成功奪亞軍，是非佳麗許亦妮奪得季軍兼最上鏡小姐。三位佳麗前晚出席電視城慶功宴。約凌晨兩時，許亦妮坐無綫專車返觀塘協和街華峰園平民寓所，早有兩名菲傭候駕。
不過，獲悉記者追訪的許亦妮抵埗後竟然拒落車，只頻頻打電話，大廈看更不禁上前打開車門，然後不耐煩問她說：「許生打落嚟話唔落嚟，你究竟落唔落車o架？」估計是許亦妮欲要求父親落樓迎接，但被拒絕。結果擾攘了10多分鐘，許亦妮始示意菲傭為她取物件，自己又披上披肩才肯落車，架子十足。朱晨麗和朱希敏同住港島區，故同坐無綫車回家。
寸嘴講債主縮沙
另外，朱晨麗得獎後在台下被追問當年參加亞姐一事，她即扮失憶，但慶功時記憶突然恢復，外事部副總監曾醒明更為她解畫，表示朱晨麗在06年確參加過《亞洲小姐網絡賽》，但電郵交表格後便沒下文；03年她又參加蘇州「水鄉儷人比賽」，接着朱晨麗解釋：「我頭先太興奮先唔記得，細節真係唔記得，但我一早同無綫交代。」會否覺亞視走寶？她說：「我冇諗咁多，總之港姐先係正式第一次。」
昨日三位港姐和國際親善小姐梁麗翹先後到尖沙嘴和佐敦領獎，再提到選亞姐網絡賽落敗，朱晨麗說：「只係遞過表格，冇收過大會通知，冇正式參選。」至於許亦妮，之前聲稱是債主的人會在前晚踩場追數，又聲言開記招，但前晚許亦妮暫平安度過，她即寸嘴說：「我都奇怪點解唔嚟，所講嘅好戲劇性。至於下一步咁激，我都有啲驚。」
收投訴指成日喊
今年港姐收視平均24點（約153萬人），最高收視時段是宣佈三甲，有28點收視（約179萬人），但相比去年平均有25點（約160萬人）略為失色。廣管局則收到兩宗港姐投訴，指有太多落淚場面，令人看後不高興。
採訪：卓寶花、王崇穎、何慧斯
攝影：楊浩賢、黃文成、陳俊強