林峯噚日入咗元朗搞簽唱會，雖然高溫熱爆，商場都焗到呼吸困難，但依然吸引到幾百個fans同觀眾撐場。Chok峯雖然遲到超過半個鐘，但等咗幾個鐘嘅fans依然冇怨言，Chok峯一出場即派送毛巾、cap帽等禮物畀fans，輕易將氣氛推高。大會又安排小朋友同fans扮Chok峯造型，Chok峯從旁教佢哋點chok樣，搞到其他fans羨慕尖叫。
為拍戲練騎馬
Chok峯稍後會同古天樂、鄭伊健合拍新戲《忠烈楊家將》，但古仔早排喺屋企跌傷咗，家要用枴杖行路，所以未知佢幾時加入劇組。Chok峯話部戲有好多動作場面，有場戲仲要騎馬奔馳，兼且喺馬背上攞兵器打鬥。Chok峯話伊健同部份演員已先到北京練騎馬，而佢就只係上過一堂，面對今次馬術挑戰，佢話要打醒精神，因為一不留神就會出意外。
近日同Chok峯傳緋聞嘅劉俐（藍莓）被指男友多籮籮，搞到Chok峯陷四角戀，對此佢話：「有睇報道，事實唔係咁，只係好正常一件事，唔回應咁多。」