有錢嘅球會，很多時都招人話柄，始終每次球員交易，轉會費一定唔少，球員嘅周薪甚至可以養活一間低組別球會數年。新球季，除了曼城外，獲卡塔爾財團注資嘅巴黎聖日耳門（PSG）就係呢類季前搶盡風頭嘅有錢球隊，但第一場法甲即「虛有其表」。
新兵盡出負羅連安特
PSG季前的確比起其他法甲球會高調得多，先是請來前國際米蘭教練李安納度出任體育總監，呢位巴西人有名氣，就正合PSG有錢財團嘅需要。不過，上周六嘅法甲頭炮，PSG落筆打三更，仲要係主場輸畀「單車之城」羅連安特0:1，而呢場聯賽球隊已經盡派新加盟嘅球員，好似加美路、文尼斯、馬杜迪、比斯華錫同施利古，但最後都喺上半場28分鐘俾羅連安特前鋒基西亞搞掂咗，輸波收場。
教練甘保亞尼唔想見到嘅畫面都出咗嚟，佢賽後就話：「我們需要時間建立球隊，目前有很多新球員在大軍名單內，他們需要尋找自己最適應的步伐，以及調教至最佳狀態。」
當然，第一場聯賽輸波，未致於會即刻執袍袱走人，之不過甘保亞尼呢次一定會寒一寒，尤其主場咁冇面輸波，對於財大氣粗嘅班主肯定唔多like，如果往後再有咩差池，帥位坐唔坐得耐真係冇人咁寫包單。
馬拉加乜料踢過至知
其實，新球季好似PSG呢類有錢球隊，表現金碧輝煌，但得唔得真係要踢過至知，睇吓西甲嘅馬拉加，買新球員好似唔使錢咁，一個接一個，仲要係有啲名氣，唔係二打六嚟，但咁係唔係代表高幾班，兼拍得住巴塞同皇馬？又係要踢過至知，所以球迷們千祈唔好盲目相信，要靠自己對眼睇清楚啲。
至於揭幕周嘅法甲都幾有冷味，衞冕嘅里爾同上季亞軍嘅馬賽都只係和波收場，強隊僅得里昂可以作客3:1擊敗尼斯。