潔余揮動長劍，單手提槍，瀟灑忘我。這幕精采演繹，為她在今年動漫節cosplay大賽中摘下一枚新人獎獎牌；其實，她一點也不新了。
文潔余算是香港cosplay界的「老前輩」，玩了cosplay12年，15歲開始扮演第一個漫畫人物，《幽遊白書》裏的浦飯幽助；女扮男裝，是她的拿手好戲。
「我自細就有表演慾，平時表達唔到嘅嘢，可以用cosplay表達出來」。潔余讀書時參加過合唱團、劇社，一身演藝DNA。「細個夢想做配音員，因為鍾意睇卡通片，家唔可以幫卡通人物配音，但係可以扮佢哋，都算係實現咗半個夢想」。
cosplay是甚麼？理論上，任何角色扮演都是cosplay，舞龍舞獅、長洲飄色、迪士尼巡遊等等都是。「廣義來講，求其着件馬騮衫都叫cosplay。我哋玩嘅係狹義嘅cosplay，跟住動漫裏面嘅人物造型來模仿」潔余說。
最享受設計創造的過程
她今次模仿的是《殺戮都市》裏的俊美型男玄野計，這個角色個難度甚高。先是一襲緊身的黑色戰衣，然後配上周身的燈泡，還有一把劍，和一支巨型散彈槍。各樣布料和配件，花了她二千元。為了完美演繹玄野計，潔余過去兩個月相當刻苦。每晚放工，第一時間回家，隨即開工造衫，深夜十一、二點才睡。
外人只能看到cosplayer亮麗浮誇的化妝衣飾，她們最享受的卻是日夜埋首設計創造的過程。以潔余今次的玄野計造型為例，那支大到無朋友的散彈槍，部份配件原來是用上梘液的空樽改裝製成，很多人都想不到這種材料，這就是滿足感。
有時，為了一個角色造型，她可以把衣服一改再改，重新做過三、四次。「cosplay要自己做衫先好玩，我哋呢代cosplayer多數自己做，新一代人就鍾意買現成嘅，上淘寶網好易買到。家嘅物資太豐富，年輕嘅cosplayer冇咗自製服飾嘅動力，我覺得咁樣失去cosplay嘅樂趣；只要花錢就買到返來嘅嘢，我反為唔會珍惜」。
玩了這麼多年，潔余家中睡房放滿了十餘年來的心血結晶，塞爆了衣櫃和床底。「我唔捨得丟，啲衫全部都係自己一針一線做出來嘅，好有感情，得閒仲會拎番出來着」。
去東京朝聖癲得很認真
除了一年一度的動漫節，潔余每月總會出動一次，多數是大學動漫學會的活動。cosplay服飾創作過程雖然很個人，但cosplay始終是一種集體社交活動，「成班friend一齊癲，有講有笑，好開心」。她甚至去過cosplay盛行的東京觀摩朝聖，癲得很認真專業。
透過動漫人物的演繹，cosplayer找到自我陶醉的感覺。潔余今次演繹的玄野計，是個與家人關係疏離的冷漠青年，但在生死關頭卻又有情有義，為朋友捨身，「我都好想做到玄野計嗰種性格，我覺得自己都係有情有義嘅人」。
專家學者可以用上千言萬語道出青少年愛玩cosplay背後的深層次社會意義，潔余也讀過一些分析文章：「啲心理學家話係一種乜嘢逃避現象，玩cosplay嗰啲人，通常冇乜自信，又不滿現實，要透過扮演動漫人物，逃離自己嘅生活。我都發覺有呢種人，我識得一個人，每次提起cosplay就好開心，但係提起佢屋企就好唔開心。不過我玩cosplay，唔係為咗逃避乜嘢。」
在老人中心工作的潔余，負責搞活動。她的cosplay嗜好，有時在工作方面也派得上用場。她任職的老人中心隸屬非牟利機構，資源匱乏。潔余玩cosplay工多藝熟，又懂得善用簡單材料造道具，老人中心搞活動時需要佈置，難不到潔余。
最後不如說說「潔余」這個名字，她說是父母的共同創作，「爸爸媽媽一人諗一個字，一個揀個潔字，一個揀個余字。文言文嘅『余』字有『我』嘅意思，加起上來就係要我潔身自愛咁解」。
潔余愛動漫人物，更愛自己。
記者：蔡元貴 攝影：馬泉崇
