免費運動App　iPhone實咪偷懶

我又重咗喇，下定決心減肥吧！要減得健康，除搵專人教導外，其實iPhoneAppStore仲有數百款有關健康同運動嘅App，好多都免費任Download，有啲仲有埋體感偵測，實姿勢啱唔啱，唔到你偷懶。

記者：許福合
攝影：林栢鈞
Model：Boo@PureModels

1.偵測姿勢節拍

放假嘅時候食得多，唔使擔心，只要有這個《FitforRhythm》，就可以幫你挽回走樣嘅身材！打開App，就會見水藍色加上可以選擇4個Q版健身教練，造型好有任天堂風格，每位教練負責唔同項目，分別有伸展運動、平衡感訓練、有氧運動、肌肉鍛煉等，分有不同難度等級，附有動畫教你玩，而且最特別係會利用iPhone體感偵測，用來檢查動作是否正確，當iPhone位置接近時，就會有聲音提示，仲會計住做咗幾多次，無得出貓！訓練項目一共有成80種，免費版亦有20種，玩完會計埋消耗多少卡路里。若果能堅持三個項目做足7天，就能得到5分獎償，儲到100分就有機會打開完整版功能。

2.真人播片操體能

覺得《FitforRhythmiPhone》太兒戲似遊戲？不妨留意運動品牌Nike推出嘅健身App《NikeTrainingClub》，主要針對瘦身及體能訓練，當中更搵來多個專業女健身教練作示範。App本身就已經佔488MB，以iPhoneApp來講認真誇張，亦足見內容落足料！訓練項目會分為不同方向，如減重、追求曲線，體能等，當中亦分為不同強度及等級，可視乎個人要求設定訓練計劃。運動時仲可以打開音樂，配合音樂節奏，據講效果會更好㖭。

3.體驗瑜伽250式

想感受瑜伽又唔想花錢？可以試吓用這個《YOGAFree：250Poses&YogaClasses》，預設多達250個瑜伽動作，分別會以暖身、基本、進階作分類。初學者建議選擇QuickRecipes，會預先設定好合適嘅課程，熟習之後可再按需要增加動作。開始上堂時，會有真人示範，部份更會附有影片，亦有聲音指導動作要求，按右上角音樂鍵，可以加入音樂聽住做瑜伽。做運動最怕就係不能堅持，附有日曆功能，每完成一個課程，就會在日曆上以小花作記錄，有無偷懶一目了然。

4.跑步有fb朋友打氣

好多人愛跑步，不用約朋友，隨時可出發，不過，想知道跑咗幾多，跑咗幾耐，咁就要用《Nike+GPS》！此App毋須使用外置感應器，主要以GPS測量，首次開啟時，記得在個人資料中輸入身高體重等資料，因為App會根據GPS，加上跑步速度及距離等資料，得出消耗卡路里。比較有趣嘅係，可以設定將開跑訊息分享到facebook，若有朋友回應的話，跑步中途就會聽到加油聲，亦可設定路程提醒，可以知道跑咗幾遠！最後當然唔少得一邊跑一邊聽歌嘅功能，跑步絕對唔悶！

5.單車咪錶計距離

騎單車亦係相當受歡迎運動之一，健身減肥皆有效果。先在《iMapMyRide》免費登記成會員，開啟新路程後，再按Start，介面上會有顯示行駛路程距離，亦可見到平均及現時速度，感覺就好似揸緊車睇咪錶一樣！另外，仲可以隨時轉去地圖Mode，從GoogleMap地圖看到路程資料。此App好用之處，係可以將記錄與MapMyRide.com網站同步，將自己威水戰績分享到twitter、Blog或電郵，與朋友分享。