環球股災，港股暴瀉近千點，千五隻個股，埋單升嘅得39隻，可見市況有幾慘烈。大戶狂隊股市，無疑係逼儲局推QE3，但早兩年嘅QE1同QE2成效係點？大家有目共睹。歐美經濟仍然病入膏肓，再推QE3，作用僅限於吊命，魏力並不睇好。
上周五港股沽空額118億銀，佔總成交近1成，反映後市吉凶嘅3隻股份──港交所（388）、滙控（005）同盈富基金（2800），就佔據沽空金額榜頭3位，明顯淡友已擺好陣，準備大開殺戒！
港交所上周五成交35億元，但沽空9.2億元，比率高達26%，睇淡味濃，無論從盈利及走勢睇，股友都應該趁反彈閃人。作為港股呢個「大賭場」負責人，旺場與否係賺錢關鍵，但3月延長交易時段後，港股成交仲少過舊年，近排都係600幾億銀，可見措施「唔做好過做」。近排不停有新股打退堂鼓，例如光銀啱啱又因為市差唔上住，集資額仲傳減半，即係少咗200幾億銀，你話港交所賺少幾多？
走勢上，港交所裂口跌穿157蚊支持位，收149.60元，下個支持位已係140蚊樓下，情況並不樂觀。
魏力