銀行股陸續派中期成績單，有驚喜亦都有平淡。不過，今年分析員會議上面，惟獨唔見「星級」銀行股分析員、被不少證券同業視為「殿堂級」巨擘嘅高盛亞洲合夥人兼董事總經理羅慕斯（RoyRamos）嘅蹤影。原來呢位無論市場份量定「噸位」都十足嘅銀行股分析師，年中已經悄悄退休喇。
對獅子行一褒一貶
喺高盛亞洲近15年，羅慕斯唱好過滙控（005）又唱淡過，最令人難忘嘅係一褒一貶，見證住獅子行榮辱興衰嘅軌迹。
行內有指「阿Roy」五十出頭就「收山上岸」，多少反映銀行股板塊，風光時代已經過去，後金融海嘯下監管重重，銀行業生態前景更趨黯淡。不過，亦有傳聞話，佢稍作休息後仲有其他部署。
同前大班老友鬼鬼
作風低調嘅羅慕斯，喺「賓架」同證券界係好出名，佢同滙控前主席龐約翰素有交情，更曾充當「記者」，以罕見答問形式，發表直述龐約翰受訪言論嘅報告，震懾市場。2000年曾估計年半內滙控見150蚊，當時滙控只係徘徊喺110蚊左右。01年911事件後，佢仍然堅持「睇好」獅子行。
不過，隨着龐大班退休，滙控陷入次按危機，羅慕斯亦逐漸睇淡集團前景，最犀利係發表循環式連環看淡報告。滙控新任行政總裁歐智華，今年初接受英國《金融時報》訪問時，指滙控係「裝咗12個汽缸」嘅超級馬力汽車，家只係「撻着咗8個而已」。羅氏隨即發表報告，直指覺得滙控「得4個汽缸撻着」，係佢退休前繼續「睇淡」嘅寫照。
行內名氣大 寶哥哥欽點提問
羅慕斯系出名門，本身擁有驕人履歷，喺商界名牌學府美國WhartonMBA畢業，加入高盛亞洲前，曾經喺美國梅隆銀行做嘢。由於佢嘅菲國國籍同「Ramos」姓氏，曾有江湖傳聞話佢係前菲國總統拉莫斯家族成員，但據聞佢已經私下否認。
以往出席分析員會議時，佢經常俾東亞銀行（023）主席李國寶「欽點」首個提問，又多次俾《AsiaMoney》、《路透社》同《InstitutionalInvestor》等，選為「TopRank」頂級銀行分析員。佢曾經直接參與一眾大行同中資行喺香港嘅上市工作，包括中銀香港（2388）、渣打（2888）、平保（2318）同H股銀行股，如交行（3328）、中行（3988）、工行（1398）等。
李華華
mailto:[email protected]