今年書展據說非常熱鬧，本港不少出版商在會展賣書賣得好好，最好賣嘅書就係華叔回憶錄「大江東去」，加加埋埋可能有二萬本。左丁山好怕擠逼，近兩年都故意避開書展，但唔表示唔買書嘅，事實上，自己啲書擺滿間屋，擺在茶几，放在地下，現在連小小辦公室嘅會議枱都擺滿書有兩呎高。呢日退休律師L請左丁山到美國會食飯講吓讀書，原來佢亦是如此，成屋都係書，客廳地下放到一「戙戙」，問佢最近睇乜嘢書，佢話受到同學退休社會學教授C之啟發，退休後捧讀中國古典，第一本就係讀史記。經佢一提，先至醒起幾個月前參加校友飯局，教授C就係揸住一本史記，但教授C話每年起碼讀一史一經，今年讀嗰兩本就係尚書與史記。
與佢地兩個相比，左丁山嘅學問比教授C相差千條街，讀書數目大概只有律師L嘅千分一，坐埋一齊講書已是夏蟲一條。講起買書讀書，香港雖有盛大書展，但平時買書風氣，與日本相距甚遠，最近在大阪住在大阪站對面之希爾頓，旺區地也，但酒店隔籬一間甲級商廈之內，竟有一間書局租咗成層，書屋能夠在繁盛區寫字樓立足，可見賣書生意不愁，唔似得香港商務負擔唔起星光行之租金，而要無奈遷離。
與肥仔K在書局內行吓行吓，竟然見到有兩個書架嘅書係關於種馬、養馬嘅，有養馬大全、北方馬場成功秘笈、騎師回憶錄等等，我地香港雖有賽馬風氣，有關賽馬之中文書籍就幾難搵得到。有一位日本資深評馬人寫咗一本「競馬基本」，肥仔K睇到咭咭笑，原來作者心細如塵，將睇馬嘅方法逐一寫下，甚至隻馬行沙圈時「便便」，亦有詳細分析便便之顏色、稀厚、軟硬等等究竟反映甚麼馬匹狀態情況，肥仔K順手買下，又買埋日本「知華派」中國研究權威天兒慧教授嘅著作，付款時，收銀員忍唔住望肥仔K一眼，大概係奇怪買馬經之人點解會買埋天兒慧嘅新書？可惜左丁山唔識日文，否則猛咁簽卡買書都似。返到嚟香港，屈穎妍師妹送我一本新書「怪獸家長2孩子復仇記」，睇書名就嚇咗一跳！