中國強起來，最強嘅往往係佢哋嘅「山寨文化」，蘋果未出iPhone5，羅湖已經有山寨版推出。中國足協剛剛公佈，由西班牙籍嘅甘馬曹接任國足新教練，唔通見西班牙咁威，想打造「山寨版狂牛兵團」？
中國喺90年代起，興起搵外籍教練執教，不過就冇咩系統同風格，好似搵過德國嘅施拉普納、英格蘭嘅霍頓、荷蘭嘅阿里漢等，根本就國際球壇興咩嘢，國足就跟風照抄可也，除咗塞爾維亞籍嘅米路天奴域有啲成績，洋帥根本對國足冇大貢獻。
好嘞！家西班牙橫掃世界球壇，贏完歐國盃又贏世界盃，連小國腳都威到盡，6月贏埋U21歐國盃，中國咁鍾意抄襲，當然又想跟西班牙風。56歲嘅甘馬曹個履歷都見得吓人，帶過西班牙國家隊同皇馬等，但除咗幫士砵亭贏過葡萄牙盃外，領軍以嚟都未威過。尤其02年世界盃，帶住擁有魯爾、安歷基、卡斯拿斯等球星嘅西班牙，8強階段俾南韓淘汰。好彩佢都有愛心一面，當年佢喺南韓期間，因為不忍南韓人食狗肉，就收養幾隻待劏嘅狗仔回國。中國都好興食狗肉，甘馬曹咁有愛心，咪隨時收養番一百幾十隻唐狗？
年薪1500萬簽約3年
其實甘馬曹都只係中國後備人選，中國足管中心主任韋迪自爆，原本就想搵前巴塞教練列卡特，仲安排咗機票，但因為雷雨關係，航班要改期，先至俾沙地阿拉伯截糊。
據報中國足協畀甘馬曹嘅3年合約，年薪有成200萬美元（約1,556萬港元），至於之後續唔續約就睇國足入唔入到2014年巴西世盃決賽周；預料甘馬曹最快8月10日對牙買加嘅友賽就會亮相。
名教練有好成績？我求大俠就好懷疑，事關西班牙嘅成功，係球會巴塞、皇馬已經建立極佳青訓系統，細細個就已經灌輸小組地面戰術及練習有關；國足呢幾年最叻係咩，咪係打交同打假波囉，要佢扭波傳波，真係難為佢哋。唔通好似A貨手袋咁，加個名牌嘜頭，就真係變咗名牌咩。
